अजिमा by guru rajendra

पौराणिक धार्मिक मान्यता कथं श्री सतीदेवीया अङ्ग पतन जूगु थाय् हे शक्तिपीठ खः धैगु मान्यता जुया वयाच्वंगु खनेदु । अथेहे देवगणया मिसा स्वरुप (स्त्रीरुप)या शक्तिस्वरुपा मान्य जुया वयाच्वंगु दु ।क्वसिमा क्वे मसानघाट सतिकं अष्टमात्रिकाया बास दुगु वा अष्टमात्रिकाया बास जुयाच्वंगु थाय् हे शक्तिपीठ खः धइगु पौराणिक व धार्मिक मान्यता कायम जुया वयाच्वंगु थन झीसं खनाच्वनागु दु ।

प्राचिन नेपाः उत्पति जुइधुंकाः नेपालमण्डरया येँ दक्षिण-मंजुपतन , यंगाल कोलिग्राम बस्ती व उत्तर-यंगू बस्ती नांया थीथी बस्ती दुगु । थ्व निगु बस्ती छगू खड्रगाकायार भूमि(जमिन) जुयाच्वंगु । थ्व खड्गाकार भूमिया स्वखेरं खुसि -बिष्णुमति खुसि , बागमति खुसि , इक्षुमति(टुकुचा) खुसि व रुद्रमति( धोब्याखुसी) खुसी व छखे भिर व सिंगु गुँ दयाच्वन । सामरिक दृष्टिकोणं थ्व नगर पलिस्था यायेत तस्कं हे पायक व पायछि जुगु खनाः कलिगत संवत 3827 पाखे लिच्छिविकालीन राजा गुणकामदेवं थ्व निगु कोलिग्राम बस्तीयात समायोजित यानाः बिष्णुमति ,बागमति , इक्षुमति (टुकुचा) व रुद्रमति(धोब्याखुसी)खुसीया सिथय् कान्तिपुरनगर पलिस्था याःगु व थ्व नगरया प्यखेरं गड्ग आकारय् अष्टमात्रिका व अजिमायुक्त शक्तिपीठ(दुग्) नगर सुरक्षा घेरा पलिस्था याःगु खँ प्राचिन नेपाल उत्पतिया इतिसय् च्वयातःगु खने दु ।नेपाः उत्पतिकाले थन मातृसतात्मक राज्यप्रणाली जुगुलिं न्हापा न्हापा तान्त्रिक आधेरे मातृशक्ति पूजा यायेगु परम्परा दुगु खःसा नं आः वयाः तान्त्रिकरुपं पुजा यायेगु चलन म्हो जुया वं सा नं शक्तिस्वरुप अजिमायुक्त शक्तिपीठत पूजायानाः हनेगु ज्या थन झीसं याना वयाच्वंगु हे दु । शक्तिपीठय् हिन्दु व बौध्द धर्मालम्बीतयसं तसकं श्रध्दाभक्ति तया हना वयाच्वंगु दु । थ्व झी नेपाःमि समाजया धार्मिक समन्वय , सहिष्णुता व सहअस्तित्वया म्हसीका खः ।
येँ कान्तिपुर नगर सुरक्षा घेराय्(दुर्गय्) लाःपिं अष्टमात्रिका शक्तिगणय् लाःपिं अजिमायुक्त शक्तिपीठ खः : - 1. लुमरी(लुमढी)अजिमा(भद्रकाली) भद्रकाली सहिदगेत 2. कङ्ग अजिमा ( चामुन्दा,चन्देश्वरी.कंकेश्वरी) कंकेश्वर 3. म्हयपि अजिमा (ज्ञानेश्वरी) म्हैपि 4. मैतिअजिमा(पञ्चकुमारी ,मैतिदेवी) मैति 5. बसला अजिमा (बसलादेवी) ग्वँल ,पशुपति 6. लुतिअजिमा (इन्द्रायणी) ढल्को 7. टकती(तखती)अजिमा (निलबाराही) टंकेश्वर कालीमाटी व 8. ङ्यतमरुअजिमा (श्वेतकाली , नरदेवी) नरदेवी ।